杜汶澤開拍香港本土電影！首次以「喱騷」身份開拍電影！ | 港產片新聞

杜汶澤創辦嘅「喱騷」娛樂平台已經踏入一周年！近日佢喺Facebook提到「喱騷」將會走進電影圈，開拍香港本土電影！

杜汶澤喺2018年成立「杜汶澤喱騷」網台後，無論飲食、戲劇、清談節目，乜都有涉獵過！喺2020年12月，杜汶澤將「喱騷」升級為付費嘅娛樂串流平台，短短一年已經有唔少多元化節目畀香港觀眾欣賞。

適逢一周年，杜汶澤除咗感謝「喱騷」台前幕後嘅努力之外，仲宣佈自己做咗一項「高風險大投資」，就係喺香港開戲拍本土電影！而呢部香港電影並非「喱騷」網上平台獨家，佢更希望電影可以喺戲院上映，等普羅大眾都可以去睇！除此之外，「喱騷」都會製作一部台港合拍片。

杜汶澤被大陸封殺後，比較少出沒於影壇。雖然近年專注於網絡娛樂，但杜汶澤都冇放棄影壇，喺2017年自編自導自演《空手道》電影亦得到一些支持。而家「喱騷」開拍香港本土電影，相信會為港產片帶嚟更多元嘅選擇！

「喱騷」短短一年已經有唔少多元化節目畀香港觀眾欣賞，例如電視劇《在觀塘下體現愛的故事》、實境節目《黃秋生大師班》、《墨水漂流》等。最近仲同田蕊妮合拍清談節目《杜氏閒情》，更表示將會有特備聖誕節目「很想和你瘋狂討論王力宏」，大談夫妻相處之道。「喱騷」嚟緊會製作更多節目，例如遠赴英國同Arm Channel 創辦人「混血肥仔」拍攝《尋找他媽的英國》，了解移居英國港人嘅生活。

最新電影資訊及電影分析，盡在My Theater電影專頁！

---

歡迎嚟到 My Theater 我的電影館 ​My Theater 係一個香港人成立嘅電影 Blog，定期為大家分享最新電影新聞和資料、精彩及經典嘅電影對白、同埋我對電影嘅見解，透過呢個網站，希望令更多人愛上電影！ 🎬 記得追蹤 My Theater Instagram: https://www.instagram.com/mytheaterclub 🎬 記得追蹤 My Theater Facebook:

https://www.facebook.com/MYTheaterClub

🎬 歡迎電郵任何試映 /廣告 /合作 /電影新聞稿至 mytheaterclubbusiness@gmail.com 📩